Home Niue Local Fenoga he Palemia Niu Silani ko Bill English

Fenoga he Palemia Niu Silani ko Bill English

1965

Kua mole atu tuai e ahiahi mai he Palemia Niu Silani ko Bill English ke he motu ke he taha ni e aho.  Haha i ai mo ia he haana a fenoga e tau Ikipule to Gerry Brownlee mo Alfred Ngaro.  Haha i ai foki e Lilifu ko Winston Peters – kua mahani tuai a ia mo e motu, ha ko e haana a tau fenoga mai fakamua.  Fakalataha mai foki e falu a tau Ekepule he Fono Ekepule ha Niu Silani.

Fakamua to hoko mai e Palemia ko English, kua fita ni e falu a tau talahauaga kua logona mai he Palemia ko Talagi ke he fenoga nei.  Kua fifili ai e Sir Toke e aho fakatata ha Hakupu Atua ke fakailoa e ia e haana a nakai fiafia, ha ko e tau fakatokatoka-aga ke lata mo e fenoga.  Ko e manako he Palemia ko Talagi, ko ia ka tali e fenoga ke he aga mo e mahani faka-Niue, ka ko e mena ne tupu he talahau e ia, kua nakai tuai taute pihia, ka kua uiina tuai he Palemia ko Bill English, ke fakalataha atu ke he taha kai-aga mena kua taute ai ke he Matavai.

Ko e falu ne pehe, ko e haana tuai ni a ia, kua tonu e fakaholoaga ia he Palemia ko English, ha ko e taha matapatu fekau haana ne kua hau ki ai, ko e hau ke hafagi e taha fale foou ha Matavai.  Ko e fale tali fenoga Matavai, kua pule ki ai e taha matakau i lalo hifo he Fakatufono Niu Silani.  Ko e taha ni a magaaho a nai ke fakakite ke he tau tagata Niu Silani, mua atu kia lautolu e tau tagata tohi tala ne o mai mo Bill English, e puhala nei ne kua fakaoga ai e tau tupe tukuhau he tau tagata Niu Silani, mo lagomatai aki a Niue.

Pete ia, kua tokologa foki a lautolu he motu ne pehe kua nakai mui tua ke he aga mo e mahani fakamotu.  Ko Niue ne kua lata ke fakafeleveia atu ke he fenoga.

Ti ko e heigoa kia e kakano hokulo ne kua hoko mai e fenoga?  Nakai foou e tau faga fenoga pehe nei, ka ko e mahuiga he fenoga nei, ko e fenoga fakamua a nei he Palemia ko Bill English he mole atu he moua e ia e kotofa-aga ke takitaki e kautu.  Lalafi atu foki ki ai, ko e fenoga fakamua ia ha nei he Ikipule ko Gerry Brownlee, ko ia ne hukui a Murray McCully.

Ko e tau fenoga pehe, ati maeke ai e Palemia Niu Silani ke kitia mata e motu, mo e feleveia mo e tau takitaki, ka e mua atu foki, ke maeke ia ia ke kitia e tau gahua ha Niue, ne kua fakamole ki ai e tau tupe lagomatai mai ia Niu Silani.

Picture credits – Dan Makaia, Niue Tourism and Ministry of Pacific Peoples.

Ko e tau tupe lagomatai ha Niu Silani ne kua foaki ma Niue ke fakafoou mo e fakalaulahi e fale tali fengoa ko e Matavai, kua molea e $10 miliona.  Fiafia lahi a Niu Silani ka kitia kua fakaaoaga pihia e tau tupe lagomatai, he talahau mai, ha kua maeke he motu ko Niue ke moua mai foki e falu a tau tupe ha ko e tau tagata kua fenoga mai ke he motu.

Kua maeke ai foki he Palemia ko Bill English ke fakailoa kua talia tuai e Niu Silani ke foaki mai kia Niue, $5 miliona ke lagomatai ke totogi e taha kave hila ka tamai he uhotoka he tofia ke lata mo e kupega-hila.  Maeke ai ke mafiti e tau fekau ka fakafano atu ke he tau motu kehe.  To tutuli e Niue e $5 miliona ke lalafi atu ke moua e katoatoa ko e $10 miliona.  Ko e kave hila nai ne fakahigoa ko e Manatua Cable, to tutaki e kave ha Niue ke he matapatu kave ma i Samoa ki Tahiti. Amanaki ke fakaholo e gahua nai ke he matahiku he tau.

Kua nakai fakauaua foki e manatu he Palemia ko Talagi ke fakailoa ke he fenoga, to nakai ni fakapukilu e haana a onoono aga lagomatai kia Niu Silani hokoia ni.  Haha i ai foki he magaaho nai e falu a tau kautu ke tuga a Initia mo Korea ne fakakite e tau manako ke lagomatai foki a Niue.  Ko e fakamatala-aga a ia he Palemia ko Sir Toke, ati pehe ai e falu, kua eke e mena ia mo fakainaina kia Niu Silani.  Fakamatala he Palemia ko Bill English, nakai fai amaamanakiaga e Fakatufono haana ke hiki e puhala he fehagai-aga mo Niue.  Mau tumau agaia ni.

Ko e manako he Palemia ko Talagi ke maeke ia Niue ke hu atu ke he tau Kautu Kaufakalataha he Lalolagi, kua fakalea ai foki ke he fenoga ne o mai.  Haha i ai e falu a mena ne kua vihu ai e fekau nai, ka kua kitia ai, nakai ko e taha mena ia ke fakauaua e manatu he Palemia ko Sir Toke.  To liu ni a ia ke fufuke mai e fekau nei ke he tau magaaho i mua.  Tokologa foki e falu he motu ne pehe, nakai fakailoa fakamahino mai he tau takitaki, ko e heigoa kia e mena kua mua atu he mitaki ke lata mo Niue, ati fakamakamaka ai pihia e Palemia Niue.

FB Comments